ފަހުގެ ތާރީޚެއްގައި ރާއްޖޭގައި ފަޅާ އެރި އެންމެ ބޮޑު ހިޔާނާތް ކަމަށްވާ އެމްއެމްޕީއާރްސީގެ މައްސަލައިގެ މުގުލުގައި ހުރި ދެ މީހުންނަކީ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ މެނޭޖިން ޑިރެކްޓަރ ހަސަން ޒިޔަތެވެ. ނުފޫޒުގަދަ މަގާމުތަކުގައި ތިބެ އެމްއެމްޕީއާރްސީ މެދުވެރިކޮށް ރަށްތަކާއި ފަޅުތައް ވިއްކައި އޭގެ ތެރެއިން 1.2 ބިލިއަން ރުފިޔާ ވަގަށް ނެގިއެވެ. އޭގެ ބޮޑުބައެއް ޖަމާކުރީ އެސްއޯއެފް ނަމަކަށް ކިޔާ އަމިއްލަ ކުންފުންޏެއް އެކައުންޓަށެވެ.

އެސްއޯއެފްގެ ތެރޭގައި ތިބީ މުހައްމަދު އައްލާމް ލަތީފު (މޮހޯ) އާއި އަހުމަދު އަޝްފާހު އަލީ އާއި މުހައްމަދު އަސީލް އަދި މުހައްމަދު ހުސެއިން (އޮއިއްޓޭ) އެވެ. އަދީބުގެ އޯޑަރަށް އެ ކުންފުނީގެ އެކައުންޓުން ނަގައިގެން ލައްކައިނާއި މިލިއަން އިން ފައިސާ ނަގައިގެން ކަޅު ދަބަސްތަކުގައި އެ ފައިސާ ބަހަން ނުކުންނަނީ އެ މީހުންނެވެ.

އެ ފައިސާ އިން މަންފާވި ނުވަތަ އޭގައި “ހޭކިފައި” ހުރި ކަމަށް ތުހުމަތު ކުރެވޭ މީހުންގެ އަދަދު 300 އާ ގާތްކުރެއެވެ.

އޭގެ ތެރޭގައި ކުރީގެ ރައީސް އަބްދުالله ޔާމީން އާއި އެމްޑީޕީ އާއި ޕީޕީއެމްގެ ލީޑާޝިޕްގެ ގިނަ މެންބަރުންތަކަކާއި ފަނޑިޔާރުންނާއި ސިފައިންނާއި ފުލުހުންގެ ވެރިންތަކަކާއި ހިޔާނާތުގެ މައްސަލަތައް ބަލަންޖެހޭ މުއައްސަސާތަކުގެ އިސްވެރިން ތިބި ކަމަށް ތުހުމަތު ކުރެވުނެވެ.

މިވަރުގެ ބޮޑު ހިޔާނާތަކަށް 8 އަހަރުވެގެންދިޔަ އިރު މިއަދާ ހަމައަށް އެއްވެސް ކޮޅެއްގައި ނުޖެހެއެވެ. އެއްވެސް ފައިސާއެއް ވީތަނެއް ނޭނގެއެވެ. އަދި މިދިޔަ ހޯމަ ދުވަހު ވެރިކަން ނިމެން ދެތިން ދުވަހަށްވެފައި އޮއްވާ ރައިސުލްޖުމްހޫރިއްޔާ އަށް ލިބިދޭ ބާރުގެ ދަށުން ހިޔާނާތުގެ ބޮޑުންނަށް މާފުކޮށް މިނިވަން ކޮށްފައެވެ.

ގިނަ ބަޔަކަށް މިކަން ވަރަށް ކުއްލި ނިންމުމެއް ގޮތުގައި ސިފަވިޔަސް ހަގީގަތުގައި މިއީ މިދިޔަ ފަސް އަހަރުގެ ތެރޭގައި ސަރުކާރުން ވަރަށް ފާޅުގައި ނިންމަމުން ދިޔަ ނިންމުންތަކެއްގެ ނަތީޖާއެވެ. ކޮރަޕްޝަނާ ދެކޮޅަށް ވާހަކަތަކެއް ދައްކަމުންދިޔަ ނަމަވެސް ފަހަތުގައި ތިބެ އެމްއެމްޕީއާރްސީގެ މައްސަލަ އަށް ފަސް އަޅަމުން ގޮސް އެންމެ ފަހުން އެއްކޮށް ވަޅުލީއެވެ.