ރައީސް ޔާމީން ސަރުކާރުގައި ކާނަލް މުހައްމަދު ނާޒިމް މިނިވަން ކުރުމުގެ މަސައްކަތުގައި އިސްކޮށް އުޅުއްވި އާދަމް އާޒިމް ވަނީ އެމްޑީޕީގެ ވެރިކަން އައުމަށް ފަހު ބޮޑެތި ކުންފުނިތަކުގެ މެނޭޖިން ޑިރެކްޓަރުގެ މަގާމް އަދާ ކުރައްވައިފަ އެވެ. އޭނާއަކީ އެމްޑީޕީގެ އެތައް މެންބަރުން ބުނާ ގޮތުން އެންމެ ހިންގުންތެރި އެއް އެމްޑީ އެވެ.

އާޒިމް އެންމެ ފުރަތަމަ އައްޔަން ކުރީ ފެން ކުންފުނީގެ މެނޭޖިން ޑިރެކްޓަރުގެ މަގާމަށެވެ. އޭނާއަކީ މީގެ ކުރިން ވެސް އެ ކުންފުނިން ކިޔަވައިދީގެން ޑީގްރީ އަދި މާސްޓާސް ވެސް ހެއްދެވި ބޭފުޅެކެވެ.

އޭނާ މީގެ ކުރިން ވަނީ އެމްޑަބްލިއުއެސްސީގެ ސީއެފްއޯގެ މަގާމާއި ބީއެމްއެލްގެ ނޮން އެގްޒެކެޓިވް ޑައިރެކްޓަރުގެ މަގާމާއި އެސްޓީއޯގެ މެނޭޖިން ޑިރެކްޓަރުގެ މަގާއި ރަޝީދު ކާޕެންޓަރީގެ ޑިރެކްޓާ ފައިނޭންސްގެ މަގާމް އަދާ ކުރައްވައިފަ އެވެ. ރައީސް އިބްރާހިމް މުހައްމަދު ސޯލިހުގެ ވެރިކަން ނިމުނު އިރު އޭނާ ހުންނެވީ އެމްޓީސީސީގެ އެމްޑީގެ މަގާމުގައެވެ.

ބޭބެގެ ޕާޓީ އެމްއެންޕީ އިން އިދިކޮޅުގައި އޮތް ނަމަވެސް އާޒިމް މަޑު ކުރެއްވީ އެމްޑީޕީގަ އެވެ. އަދި އެ ޕާޓީ އަށް ރަސްމީކޮށް ސޮއި ކުރުމަށް ފަހު އޭނާ ހޯދި އިތުބާރާއެކު އާޒިމް އަށް އެ ޕާޓީގެ މޭޔަރުކަމުގެ ޓިކެޓު ވެސް ކަށަވަރުވި އެވެ.