އޭގެ ޖަވާބު އޮތީ ކެޕިޓަލް މެރީން އެންޑް އިންވެސްޓްމަންޓް (ސީއެމްސީ) ނަމަކަށް ކިޔާ ބޭރުގެ ކުންފުންޏަކުން ސަރުކާރަށް އޮފަރ ކުރި ވަރުގަދަ ޑީލެއްގަ އެވެ.

ސީއެމްސީ އިން ސަރުކާރަށް ހުށަހެޅީ ރާއްޖޭގެ އެންމެ އަގު ބޮޑު މާލެ ސަރަހައްދުން އެ ކުންފުނިން ހިއްކާ ދޭ ބިންތަކުން 70 ހެކްޓަރުގެ ބިން 99 އަހަރަށް ދިނުމަށެވެ. އެގޮތުން ފުށިދިއްގަރުން 60 ހެކްޓަރުގެ ބިމާއި ހުޅުމާލެއިން 10 ހެކްޓަރުގެ ބިން ދިނުމަށް އެ ކުންފުނިން އެދުނެވެ.

އޭގެ ބަދަލުގައި ދައުލަތަށް މާ ބޮޑު މާލީ ބުރައެއް އުފުލަން ނުޖެހޭ ގޮތަށް އަދި ސަރުކާރުން ބޭނުންވާ އަވަސް ސްޕީޑުގައި ފުށިދިއްގަރުފަޅު ހިއްކުމަށް އެ ކުންފުނިން އެއްބަސްވެ އެވެ.

އެއީ ސަރުކާރުން ހުޅުވާލި ފުރުސަތެއްގައި ކުރިމަތިލި ބައެއް ނޫނެވެ. އެއީ ކެޕިޓަލް އިންވެސްޓަމަންޓް އިސްވެ ސަރުކާރަށް ހުށަހެޅި ޕްރޮޕޯސަލް އެކެވެ. މާލީ ހާލަތު ރަނގަޅު ނޫން އިރު މިފަދަ އޮފަރ އެއް ލިބުމަކީ ސަރުކާރުގެ ކަމާބެހޭ ފަރާތްތަކުން ސިފަ ކުރައްވާ ގޮތުގައި “ރަނުގެ” ފުރުސަތަކަށެވެ.

“އަޅުގަނޑުމެންގެ ދަރަނީގެ ހާލަތަށް ބަލާއިރު ގައުމަށް ފައިދާ ހުރި އިންވެސްޓަރ ފައިނޭންސްތަކަށް ހުޅުވިފައި އޮންނަން ޖެހޭ. 70 ހެކްޓަރަށް 1083 ހެކްޓަރުގެ ބިމަކީ ރާއްޖެ އަށް ހުރިހާ މާނައެއްގައި ވެސް އިންތިހާއަށް ރަނގަޅު ޑީލެއް.” ކޮންސްޓްރަކްޝަން މިނިސްޓަރު އަބްދުالله މުއްތަލިބް ‘އެކްސް’ގައި ވިދާޅުވި އެވެ.

މާލެ ސަރަހައްދުން 70 ހެކްޓަރުގެ ބިން ބޭރު ބަޔަކަށް ދެނީ އޭ ބުންޏަސް މި ދައްކަނީ ކިހާ ސަރަހައްދެއް ކަމެއް އާންމު މީހަކަށް އަންދާޒާ ކޮށްލަން ފަސޭހަ ނުވަދާނެ އެވެ. އެ އަދަދު އެހެން މަޝްރޫއުތަކާ އަޅައި ކިޔާލަން ޖެހެ އެވެ.

ހުޅުމާލެއިން 1200 އެއްހާ ގޯތި ދިނުމަށް ސަރުކާރުން ހިއްކި ފޭސް 3 ގައި ވެސް ހުންނަނީ 63 ހެކްޓަރެކެވެ. މިންއަޅައިފި ނަމަ 70 ހެކްޓަރަކީ ހުޅުމާލެ ފޭސް އެކެއްގެ އެއްބައެވެ. ނުވަތަ ގާތްގަނޑަކަށް މާލޭގެ ދެ އަވަށެއްހާ ބޮޑު ސަރަހައްދެކެވެ. މިވަރުގެ ޑީލެއް ނިންމާލި އިރު ވިސްނާލަން ޖެހޭ ދެތިން ކަމެއް އެބައޮތެވެ.